Qeveria e koalicionit e ish-kancelarit gjerman Helmut Kohl gënjeu Turqinë për angazhimin e Berlinit për të mbështetur ofertën e vendit për t’u anëtarësuar në BE, njoftoi agjencia shtetërore e lajmeve Anadolu e Turqisë, duke cituar pjesë nga dokumentet e deklasifikuara të publikuara nga revista gjermane Der Spiegel.
Der Spiegel botoi fragmente nga arkivi i Ministrisë së Jashtme, të cilat zbulojnë detaje të rëndësishme për politikën e qeverisë Kohl ndaj Turqisë në fillim të viteve 1990.
Sipas një dokumenti të datës 13 korrik 1992, ministri i atëhershëm i Jashtëm gjerman Klaus Kinkel i tha homologut të tij turk Hikmet Cetin gjatë një vizite në Ankara se Gjermania do të mbështeste anëtarësimin e plotë të Turqisë në BE, të quajtur atëherë Komuniteti Evropian.
Kinkel u përpoq të qetësonte homologun e tij turk, raportoi Anadolu, duke cituar një raport të deklasifikuar, se përshtypja se evropianoperëndimorët nuk e donin Turqinë në klubin evropian ishte e gabuar dhe nënvizoi se Berlini do të mbështeste Ankaranë në qëllimin e saj për t’u bërë një anëtare e plotë e BE-së.
Megjithatë, vetëm tre ditë më vonë, vëren agjencia turke, kancelari i atëhershëm Kohl i tha kryeministrit norvegjez Gro Harlem Brundtland gjatë një vizite në Oslo se qeveria e tij ishte nën presion masiv nga Turqia për anëtarësim të plotë, por politikani konservator theksoi se ishte kundër dhe deklaroi: “Turqia nuk mund të bëhet anëtare” e klubit evropian.
Gjithashtu më 5 nëntor 1992, kancelari i atëhershëm gjerman i tha kryeministres së atëhershme polake Hanna Sukhotska, sipas Anadolu duke cituar dokumente të deklasifikuara gjermane, se integrimi i plotë i Turqisë në Komunitetin Evropian ishte “i paimagjinueshëm” nga ana e Gjermanisë. /tesheshi.com/
