Studiuesit nga Spanja kanë zbuluar ishuj të fundosur që u zhdukën në oqean miliona vjet më parë, dhe disa prej tyre kanë ende plazhe të pacenuara.
Ky zbulim magjepsës mund të jetë burimi i legjendës së Atlantidës së humbur, sipas Luis Somoza, kreu i një projekti për të studiuar aktivitetin vullkanik pranë Ishujve Kanarie.
Një ekip shkencëtarësh i gjeti këto ishuj në një mal nënujor të njohur si mali Los Atlantes, i cili shtrihet rreth 50 kilometra në diametër dhe përbëhet nga tre vullkane tashmë të fjetura. Baza e tij shtrihet në një thellësi prej afërsisht 2.3 kilometra nën sipërfaqen e oqeanit. Mali u emërua sipas qytetërimit legjendar të Atlantidës, i cili, sipas mitit, u zhduk në oqean për shkak të imoralitetit të banorëve të tij.
“Këto ishuj dikur ishin mbi sipërfaqen e detit, por ata u fundosën dhe ende po fundosen, ashtu siç e përshkruan legjenda e Atlantidës”, tha Somoza, një gjeologe në Institutin Gjeologjik dhe Minierave Spanjolle (IGME-CSIC).
Plazhe, shkëmbinj, duna
Shkencëtarët zbuluan malin Los Atlantes duke eksploruar shtratin e detit në lindje të Lanzarotes në pjesën më lindore të ishujve Kanarie, duke përdorur një mjet të drejtuar nga distanca (ROV). Kjo ekspeditë ishte pjesë e projektit Atlantis IGME-CSIC, i cili synon të kuptojë më mirë aktivitetin vullkanik dhe hidrotermal nënujor në rajon.
Mali Los Atlantes duket të ketë qenë një seri ishujsh gjatë Eocenit (56 deri në 34 milionë vjet më parë). Kur vullkanet pushuan së shpërthyeri, llava u ngurtësua dhe u bë më e dendur, duke bërë që ishujt të fundosen. Megjithatë, disa nga tiparet dalluese të atyre ishujve të humbur ende ekzistojnë.
“Ne identifikuam plazhe, shkëmbinj dhe duna rëre në majën e sheshtë të malit detar,” tha Somoza. Rëra që tani mbulon shkëmbin vullkanik është depozituar ndoshta gjatë zhytjes aktive të ishullit. Disa nga këto plazhe janë vetëm 60 metra nën sipërfaqen e oqeanit.
Gjatë epokës së fundit të akullit, kur nivelet e detit ishin dukshëm më të ulëta, vullkanet e fjetura do të rishfaqeshin si ishuj, duke siguruar strehim për kafshët e egra. Me rritjen e nivelit të detit pas përfundimit të Epokës së Akullnajave, ishujt u fundosën përsëri.
Ekipi tani do të analizojë mostrat e mbledhura nga Los Atlantes për të datuar shkëmbinjtë vullkanikë dhe për të përcaktuar se kur ishujt filluan të fundosen. Ata gjithashtu planifikojnë të kthehen në vullkanet nënujore të ishujve Kanarie gjatë ekspeditës vitin e ardhshëm. /tesheshi.com/
