Zyra e Lartë për Siguri e BE-së në Bruksel, e cila drejtohet nga Federica Mogherini, do të ketë akses për përgjimin e telefonatave hyrëse dhe dalëse nga Shqipëria.
Siç mësohet nga burime qeveritare, sipas marrëveshjes që u firmos të enjten në Tiranë mes Mogherini-t dhe ministrit të Jashtëm, Ditmir Bushati, Bashkimi Europian do të ketë qasje në informacionin e klasifikuar në Shqipëri.
Përveç çështjeve të telefonatave, çdo informacion teknologjik nga pikat kufitare shqiptare, si nga kamerat e vendosura në pikat doganore, do të kalojë në qendrën e sigurisë e cila ndodhet në kryeqytetin e Bashkimit Europian, në Bruksel.
Dy janë arsyet e kësaj urgjence të Brukselit për të patur qasje në informacionin nga Shqipëria: kriza e refugjatëve dhe terrorizmi.
Bashkimi Europian i ka bërë thirrje Shqipërisë që të marrë një sasi të caktuar refugjatësh, por kryeministri Edi Rama kërkoi që Tirana të shpërblehet me një kuotë të caktuar financiare.
Nënshkrimi i kësaj marrëveshjeje krijon kushtet që ministritë dhe institucionet shtetërore të vendit tonë të arrijnë në ujdi në të cilat përfshihet shkëmbimi i informacionit të klasifikuar me Bashkimin Europian. Kjo marrëveshje, sipas Ministrisë së Jashtme, është një hap i rëndësishëm në kuadër të intensifikimit të bashkëpunimit mes Shqipërisë dhe BE-së në fushën e sigurisë.
Sipas përmbajtjes të kësaj marrëveshjeje, informacion i klasifikuar janë njoftimet, dokumentet dhe materialet, pavarësisht nga forma, natyra ose mënyra e transmetimit të tyre, për të cilat është caktuar një shkallë klasifikimi ose nivel ndjeshmërie, dhe që, në interes të sigurisë kombëtare dhe në pajtim me ligjet dhe rregulloret kombëtare të palëve, kërkojnë mbrojtje ndaj çdo shkeljeje, shkatërrimi, përvetësimi, përhapjeje, humbjeje, aksesi nga ndonjë individ i paautorizuar ose nga çfarëdolloj tjetër komprometimi.
Pjesë nga marrëveshja
Informacioni i klasifikuar do të transmetohet nga njëra palë tek tjetra nëpërmjet kanaleve diplomatike. Në rastet kur legjislacioni i vendit të origjinës parashikon mënyrë të ndryshme për transmetimin atëherë ai do të kryhet në bazë të tij.
Gjithashtu, Autoritetet e Sigurisë së palëve, me marrëveshje të përbashkët, mund të bien dakord që informacioni i klasifikuar mund të dërgohet me mjete të ndryshme nga ato të kanaleve diplomatike, nëse kjo metodë transmetimi duket e papërshtatshme ose e vështirë.
Marrëveshja parashikon rastet kur njëra prej palëve, që ka ndërmend të lidhë ose të autorizojë një prej palëve të saj kontraktuese, të lidhë një kontratë të klasifikuar me një palë kontraktuese të palës tjetër. Autoritetet e Sigurisë së palëve, në marrëveshje, kontrollojnë që kjo palë kontraktuese ka nivelin e përshtatshëm të certifikatës së sigurisë për të përmbushur kontratën e klasifikuar. Në mungesë të një certifikate të tillë, Autoriteti i Sigurisë së palës marrëse fillon procedurën e çertifikimit të palës kontraktuese në nivelin e përshtatshëm të sigurisë”. /tesheshi.com/
