Të gjithë e duan po aq sa e urrejnë, e pastaj kërkojnë të dinë prej tij. E ai është gjithnjë gati t’u japë “lëndën” e preferuar me përgjigjet e tij, që më pas përhapen vetvetiu. Së fundmi gazetarët e pyetën për akuzat për evazion fiskal në Spanjë, në kohën kur drejtonte Realin e Madridit, 5-6 vjet më parë.
Bëhet fjalë për mbi 3 milion euro të deklaruara, për të cilat mediat nxituan të shkruajnë. Por tipiku Mourinjo, e gjeti një përgjigje pa përgjigje sërish: “Deri tani nuk më ka telefonuar asnjë prokuror apo ndonjë përfaqësues i drejtësisë në Spanjë. Ndaj nuk ka asgjë të vërtetë. Megjithatë, mund t’u jepni atyre numrin tim, nëse kjo ndihmon”- është përgjigjur portugezi që aktualisht drejton Mancester Junajtid.
Gazetarët qeshën sërish, por titulli bëri xhiron e rrjeteve. E sërish të gjithë shkruajtën për një dashuri-urrejtje që ai ka me opinionin e gjerë. Ose siç e ka përshkruar Alba Parieti, e fiksuar pas tij, në kohën kur “Hozeja i madh” drejtonte Interin e Milanos: Ai është Amour…injo. /tesheshi.com/
