Amnesty International ka akuzuar Izraelin për kryerjen e një “gjenocidi të drejtpërdrejtë” kundër palestinezëve në Gaza duke zhvendosur me forcë shumicën e popullsisë dhe duke krijuar qëllimisht një katastrofë humanitare.
Forcat izraelite në Gaza kanë shkelur Konventën e Kombeve të Bashkuara për Gjenocidin me akte që përfshijnë “shkaktimin e dëmtimeve të rënda trupore ose mendore ndaj civilëve” dhe “shkaktimin e qëllimshëm të kushteve të jetesës të llogaritura për të sjellë shkatërrimin e tyre fizik”, tha organizata e të drejtave të njeriut në raportin e saj vjetor.
Izraeli vazhdimisht “mohoi, pengoi dhe nuk lejoi apo lehtësoi” aksesin humanitar në Gaza dhe sulmoi qytetin jugor të Rafah, pavarësisht paralajmërimeve nga bashkësia ndërkombëtare dhe Gjykata Ndërkombëtare e Drejtësisë në lidhje me “efektin shkatërrues që kjo do të kishte mbi popullsinë civile”, shtoi organizata.
“Që nga 7 tetori 2023, bota është bërë audiencë e një transmetimi të drejtpërdrejtë të gjenocidit”, tha Sekretarja e Përgjithshme e Amnesty International, Agnes Callamard, në hyrje të raportit.
“Shtetet janë parë të pafuqishëm teksa Izraeli vret mijëra e mijëra palestinezë, duke shkatërruar familje të tëra shumëgjeneracionale, shtëpi, mjete jetese, spitale dhe shkolla.”
Izraeli dhe “aleatët e tij të fuqishëm, kryesorët ndër të cilët Shtetet e Bashkuara, kanë pretenduar ose vepruar sikur e drejta ndërkombëtare nuk zbatohet për ta”, shkroi Callamard. /tesheshi.com/
