Një raport i ri i organizatës Amnesty International paraqet një panoramë të zymtë të Egjiptit të sotëm. Sipas këtij raporti, qindra egjiptianë janë torturuar dhe zhdukur gjatë një fushate për t’i shtypur zërat kundër në vend.
Ndërsa vetë qeveria pranon se së paku 34.000 persona janë prapa hekurave, fëmijë, studentë, aktivistë politikë e protestues janë zhdukur pa lënë gjurmë pas bastisjes së shtëpive të tyre. Shumë prej të zhdukurve janë mbështetës të ish-presidentit Muhammed Mursi, të larguar me forcë nga detyra në korrik të 2013-tës.
Drejtori i kësaj organizate për Lindjen e Mesme dhe për Afrikën e Veriut, Philip Luther, deklaron se zhdukjet janë bërë një instrument kyç i politikës shtetërore nën qeverisjen e presidentit aktual, e-Sisi, e të ministrit të Brendshëm, Mexhdi Abdulgaffar.
Raporti vë në pah jo vetëm brutalitetin ndaj të zhdukurve, por edhe marrëveshjen midis forcave kombëtare të sigurisë dhe autoriteteve të drejtësisë për t’i mbuluar gjurmët e paudhësive.
Në raport jepet rasti i një 14-vjeçari, Mazen Muhamed Abdallah, i marrë në shtëpinë e tij nga agjentët e Agjencisë Kombëtare të Sigurisë e të akuzuar si anëtar i Vëllazërisë Muslimane e si pjesëmarrës në protesta të paligjshme. Raporti flet për tortura të tmerrshme të kryera ndaj djaloshit, për ta shtrënguar atë të japë një dëshmi të rreme. Ai do të lirohej pesë muaj pas arrestimit, por gjithsesi në pritje të gjykimit.
Po ashtu në raport zë vend dhe rasti i studentit italian Giulio Regeni, i cili u zhduk papritmas e u gjet më pas i vdekur në anë të një rruge kombëtare, me shenja të dukshme dhune në trup. Autoritetet egjiptiane të sigurisë e kanë mohuar vendosmërisht që të kenë gisht në vrasjen e tij.
Më shumë se 1.000 persona janë vrarë që kur Abdulfettah es-Sisi e mori dhunshëm pushtetin tre vite më parë. /tesheshi.com/
