“Një grumbull ligjesh të reja kundër terrorizmit në gjithë Evropën janë diskriminuese kundër muslimanëve dhe refugjatëve, duke përhapur frikë dhe tjetërsim”, ka thënë Amnesty International në një raport të publikuar së fundmi.
Grupi i të drejtave të njeriut jep alarmin kundër masave të sigurisë të miratuara gjatë dy viteve të fundit në 14 vendet e BE-së, përfshirë kompetencat e zgjeruara të mbikqyrjes (survejimit). Brenda kësaj periudhe, gjatë sulmeve militante janë vrarë rreth 280 njerëz në Francë, Belgjikë dhe Gjermani.
Sulmet, kryesisht të pretenduara nga grupi i Shtetit Islamik, kanë nxitur tensionet në lidhje me emigracionin, kanë ushqyer popullaritetin e partive të krahut të djathtë dhe e ka bërë sigurinë një temë kryesore në zgjedhjet e ardhshme në Francë, Holandë dhe Gjermani.
“Në gjithë hapësirën rajonale të BE-së, shohim muslimanët dhe të huajt duke u barazuar me terroristët”, tha Julia Hall, një ekspert për antiterrorizëm i Amnesty International dhe autor i raportit. “Ky stereotip prek në mënyrë aq disproporcionale këto komunitete, sa ka një shkallë të lartë të frikës dhe tjetërsimit”.
Ajo paralajmëroi se masat drakoniane të mbikqyrjes dhe kompetencat e kërkimit, ndalimit dhe arrestimit, si ato që janë futur në Francë që nga nëntori i vitit 2015, kur gjatë sulmeve u vranë 130 njerëz, mund të çojnë drejt në abuzime duke shënjestruar aktivistët ose grupet minoritare që nuk përbëjnë një kërcënim të vërtetë.
Amnesty është kritike për projektligjin e Bashkimit Evropian që do të miratohet gjatë këtij viti, që kërkon të ndëshkojë njerëzit që udhëtojnë ose që planifikojnë të udhëtojnë për t’iu bashkuar ndonjë grupi terrorist. Aty thuhet se formulimi i ligjit është i paqartë.
Por një zëdhënëse e Komisionit Evropian i hodhi poshtë kritikat e Amnesty dhe tha se BE do të monitorojë nga afër për abuzimet e mundshme në 28 vendet anëtare të bllokut.
Komisioneri i Sigurimit të BE-së Julian King tha se ishte dakord me raportin se të drejtat themelore nuk duhet të vihen në rrezik. “Kjo është ajo të cilën terroristët po e sulmojnë”, tha ai në Të itter.
Grupi për të drejta ka dënuar atë që është quajtur përdorimi “Orwellian” i orës policore, kufizimeve të udhëtimit dhe kontrolleve të policisë për të monitoruar individë të cilët nuk kanë qenë të dënuar për krime dhe shpesh nuk e dinë se për çfarë janë akuzuar.
Hall ka kritikuar atë që ajo e përshkroi si “një qeveri që është në kërkim të një personi dhe thotë: “Ju më dukeni shumë të dyshimtë. Andaj do të kufizoj lëvizjen tuaj, ngase mendoj se ju mund të kryeni ndonjë krim”. /tesheshi.com/
