Amnesty International (AI) të hënën akuzoi qeverinë siriane dhe aleatin e saj rus për kryerjen e “krimeve të luftës”, pasi dokumentoi 18 sulme vitin e kaluar në shkolla dhe objekte mjekësore në veriperëndim të Sirisë.
Në atë pjesë të Sirisë së shkatërruar nga lufta, ku ndodhet provinca e Idlib, fortesa e fundit kryesore e grupeve të armatosura dhe rebelëve, një armëpushim i brishtë ka mbretëruar që nga fillimi i marsit, pas disa ofensivash të ashpra nga autoritetet siriane, me mbështetjen e aviacionit rus.
Operacionet, të cilat filluan në dhjetor dhe u pasua nga sulme ajrore pothuajse të përditshme, zhvendosën gati një milion njerëz, sipas shifrave të Kombeve të Bashkuara, dhe rreth 500 civilë u vranë, tha Observatori Sirian për të Drejtat e Njeriut (SOHR).
Amnesty pretendon se nga 5 maji 2019 deri në 25 shkurt të vitit 2020, dokumentoi 18 sulme ndaj objekteve mjekësore dhe shkolla të kryera nga forcat e Bashar al-Asadit dhe forcat ruse.
“Ne kemi prova që, të marra në tërësi, sulmet e dokumentuara nga forcat e qeverisë siriane dhe forcat ruse përfshijnë një mori shkeljesh serioze të ligjit ndërkombëtar humanitar”, paralajmëron AI.
“Këto sulme mund të konsiderohen një krim lufte.”
OJQ me qendër në Londër akuzon Sirinë dhe Rusinë se “sulmojnë me vetëdije civilë dhe objekte civile, siç janë spitalet dhe shkollat”.
Shumica e sulmeve ndaj Idlibit, por edhe ndaj territoreve rebele në provincat fqinje të Halep dhe Hama, u bënë në janar dhe shkurt të këtij viti, shtoi Amnesty. /tesheshi.com/
