Nga Mensur Krasniqi
Pas vendimit të presidentit maqedonas, Gjorgje Ivanov, për t’i amnistuar të gjithë funksionarët politikë të akuzuar në aferën e përgjimeve, në opinionin vendas e më gjerë u ngritën shumë dilema.
Njëra ndër to ishte edhe fati i Prokurorisë Speciale dhe mundësia për propozim të ndërkombëtarëve që në Maqedoni, për të gjitha rastet e lartëpërmendura të vendos një Gjykatë Speciale, me ç’rast do shpallet nul vendimi i Ivanovit për amnisti.
Sipas ekspertit të çështjeve juridike, Murat Aliu, ngjarjet e fundit në skenën politike në Maqedoni dëshmuan që është shumë vështirë të parashikohen veprimet dhe vendimet e institucioneve, të cilat realisht janë nën kontroll të pushtetit aktual. Mirëpo duke pasur parasysh faktin që Prokuroria Speciale është ide e komunitetit ndërkombëtar, sipas Aliut ata nuk do të lejojnë shuarjen e një institucioni të tillë pa kryer misionin për të cilin është themeluar.
“Në këtë kontekst mendoj që nuk duhet shpërfillur apo nënçmuar mundësia për shfuqizimin e Prokurorisë Speciale, ku sipas gjitha gjasave rolin e xhelatit do ta luajë Gjykata Kushtetuese. Sepse nga një regjim autoritar, me elementë të theksuar të totalitarizmit, mund të pritet gjithçka. Mirëpo, prapëseprapë mendoj se një hap i tillë është tepër radikal, dhe pasojat e tij mund të jenë të rënda për Maqedoninë. Kurse nga ana tjetër, edhe faktori ndërkombëtar nuk do të lejojë një gjë të tillë, sepse, shpresa e vetme e opinionit demokratik për një minimum drejtësie është pikërisht Prokuroria Speciale. Përveç kësaj, duke pasur parasysh faktin që “Specialja” është projekt amerikan, mendoj që këta të fundit nuk do të lejojnë një gjë të tillë. Por sidoqoftë është e sigurt që Prokuroria Speciale, ashtu si edhe deri më tani, edhe në të ardhmen do të has në obstrukcione të fuqishme nga ana e pushtetit”, deklaroi për portalin tesheshi.com, Murat Aliu.
Nga ana tjetër, Aliu shprehet skeptik lidhur me themelimin e një Gjykate Speciale, meqë konstelacionet politike momentale ende nuk janë të përshtatshme për një gjë të tillë.
“Çështja apo ideja e Gjykatës Speciale një kohë të gjatë qarkullon në opinon, mirëpo deri më tani akoma nuk kemi parë donjë iniciativë më serioze për themelimin e saj, as nga faktori ndërkombëtare por as edhe nga vet opozita në Maqedoni. Mendoj që konstelacionet politike momentale nuk janë të përshtatshme për një gjë të tillë, dhe si rrjedhoj mendoj që ndërkombëtarët nuk do të parashtrojnë një kërkesë të tillë. Këtë bindje ma përforcon edhe fakti që faktori ndërkombëtar nuk ka qenë edhe aq i vendosur në vendosjen e drejtësisë në Maqedoni dhe largimin e këtij pushteti autoritar dhe kriminel”, shtoi më tutje, eksperti juridik, Murat Aliu.
Ndërkaq, sipas politikologut Muhamed Jashari, vendimi për amnisti i presidentit të shtetit maqedonas, Gjorgji Ivanov, jo që nuk ka ofruar ndonjë zgjidhje, por ka futur edhe më shumë shtetin në një rrugë të pafund problemesh, që as edhe ndërkombëtarët nuk po i bien në fije. Me këtë vendim, është paralizuar edhe një institucion i krijuar nga vullneti dhe propozimi i ndërkombëtarëve për hetimin e gjithë të korruptuarve që dalin nga përgjimet e bisedave telefonike që më parë kishte publikuar lideri i opozitës maqedonase, Zoran Zaev.
“Vendimi i presidentit të shtetit për amnesti vjen në një moment kur kriza politike në Maqedoni dita-ditës po thellohet edhe më tepër. Ky vendim i tij jo që ofron zgjidhje por duket se e fut Maqedoninë në një drejtim të panjohur. I njëjti, paralizon punën e Prokurorisë Speciale dhe është në kundërshtim të plotë me faktorin ndërkombëtar. Ivanovi nëpërmjet vendimit për amnisti legjitimon polikanët korruptues.”, deklaroi për portalin tesheshi.com Muhamed Jashari.
Për dallim nga bashkëfolësi i parë, Muhamed Jashari mendon që në një moment të tillë kur gjykatat vendore nuk përfillin Prokurorinë Speciale, është e nevojshme formimi sa më parë i Gjykatës Speciale. /tesheshi.com/
