Anija kozmike Odysseus e kompanisë Intuitive Machines nga qyteti amerikan i Houston u ul të premten, më 23 shkurt, rreth orës 12:30, në kraterin Malapert A në Hënë, duke e bërë Odysseus anijen e parë amerikane që u ul në Hënë pas 50 vitesh.
Informacionin për uljen e suksesshme të anijes e ka konfirmuar drejtori i misionit, Tim Crain, duke theksuar se është një moment historik që shënon uljen e parë amerikane në Hënë që nga viti 1972.
“Mirë se erdhe në hënë,” shtoi Crain.
Odysseus u lëshua më 15 shkurt me raketën Falcon 9 të SpaceX.
Sipas drejtorit të NASA-s, Bill Nelson, misioni është një triumf, një hap i madh përpara për të gjithë njerëzimin.
“Sot, për herë të parë në më shumë se gjysmë shekulli, Shtetet e Bashkuara u kthyen në Hënë. Për herë të parë në historinë njerëzore, një kompani amerikane udhëhoqi një udhëtim atje lart,” theksoi Nelson.
NASA shpreson, ndër të tjera, që përfundimisht të krijojë një prani afatgjatë në Hënë. Plani është mbledhja e ujit nga akulli për pije dhe karburant raketash. NASA po e bën këtë si pjesë e programit Artemis, i cili synon të krijojë një bazë në Hënë, një parakusht për misionet e ardhshme njerëzore në Mars.
Odysseus solli në Hënë kamera për hulumtimin e ndryshimeve në sipërfaqen hënore nën gazrat e shkarkimit të motorëve të anijes, si dhe një pajisje për analizimin e reve të ngarkuara me grimca pluhuri që notojnë mbi sipërfaqe në muzg për shkak të rrezatimit të Diellit. /tesheshi.com/
