Avioni i rrëzuar rus mbetet ende në qendër të debateve dhe të polemikave në nivel ndërkombëtar. Turqia e bazon arsyetimin e saj se rrëzimi i avionit nuk ishte sulm ndaj Rusisë tek fakti se përkatësia e mjetit fluturues luftarak nuk ishte e ditur në momentin e goditjes. Ndërsa rusët pretendojnë të kundërtën, pra, se turqit e dinin prej amerikanëve se cilit shtet i përkiste avioni.
Por kanë qenë dy zyrtarë amerikanë që në kushtet e anonimitetit i kanë deklaruar agjencisë së lajmeve Reuters se Rusia nuk i pati informuar forcat ushtarake amerikane për planin e fluturimit të avionit të saj përpara se Turqia ta rrëzonte atë të martën, pavarësisht pretendimeve për të kundërtën nga presidenti Vladimir Putin.
Ky i fundit ka aluduar për bashkëfajësi të amerikanëve, me idenë se amerikanët mund t’ua kenë dhënë turqve planet operacionale ruse. E ka bërë këtë gjë të enjten, kur u ka deklaruar gazetarëve se rusët i informuan partnerët amerikanë se kur dhe ku do të operonte avioni luftarak. “Pikërisht më pas forcat ajrore turke e rrëzuan avionin rus,” deklaroi Putin.
Megjithatë, dy zyrtarët amerikanë thanë se rusët nuk i kishin përcjellë hollësitë operacionale të sugjeruara nga Putin, bën të ditur Reuters. Për më tepër, ende nuk është i qartë niveli i komunikimit mes forcave ruse dhe amerikane para dhe pas incidentit.
Rusia dhe SHBA-të arritën një marrëveshje në tetor për të shkëmbyer informacione mbi operacionet në Siri për të shmangur çdo incident të mundshëm.
Avioni luftarak rus i goditur dhe i rrëzuar në fillim të kësaj jave ishte i pari i rrëzuar nga një vend i NATO-s që nga lufta koreane në vitin 1952. /tesheshi.com/
