SHBA-të kanë paralajmëruar një ditë më herët se nuk do ta njohin rajonin autonom federal të kurdëve në Siri.
Qëndrimin e ka bërë të ditur zëdhënësi i Departamentit të Shtetit, Mark Toner, që ka deklaruar para gazetarëve: “Ne jemi shumë të qartë se nuk do të njohim asnjë zonë autonome vetëqeverisëse brenda Sirisë. Mbetemi të angazhuar ndaj unitetit dhe integritetit territorial të Sirisë.”
Turqia e ka kundërshtuar gjithashtu një sipërmarrje të tillë. Një zyrtar i Ministrisë së Jashtme turke tha se vendi i tij mbështet unitetin kombëtar të Sirisë, e çdo lëvizje e njëanshme, si shpallja e një federate, nuk mund të jetë e vlefshme.
Sipas planit të PYD-së, Partisë së Unionit Demokratik, rajoni federal do të përfshijë tre zona autonome në veri të Sirisë. Dhe sipas Idris Nassanit, një zyrtar në Departamentin e Punëve të Jashtme të Kobanit, njërës prej zonave autonome, akti do të nënkuptojë “zgjerimin e kornizës së vetadministrimit që kanë formuar kurdët dhe të tjerët”.
Pikërisht për rolin e PYD-së dhe të krahut të saj të armatosur, YPG-së, ka patur fërkime mes Turqisë dhe SHBA-ve. Turqia e çmon PYD-në si degën siriane të PKK-së, organizatës terroriste turke, ndërsa SHBA-të nuk ndajnë të njëjtin mendim, duke patur një qasje të kundërt ndaj saj.
PYD-ja është lënë jashtë bisedimeve në Gjenevë, si pasojë e presionit të Turqisë, që nuk ka pranuar assesi që ajo të jetë në tavolinën e negociatave të paqes. /tesheshi.com/
