Ashtu siç qe paralajmëruar, sulmi kimik në provincën e Idlibit, për të cilin akuzohet regjimi sirian, nuk ka mbetur pa përgjigje. Donald Trump, presidenti i ri amerikan, kishte lënë të kuptohej për zhvillime të reja në reagimin e tij pas ngjarjes, por pa shkuar më tej. Sot, në orët e para të së premtes, amerikanët kanë goditur Sirinë.
“Trump nis sulmin ushtarak kundër Sirisë,” është titulli i raportimit më të fundit të CNN-it amerikan.
“Shtetet e Bashkuara nisën të enjten një sulm ushtarak mbi një objektiv qeveritar sirian në përgjigje të sulmit të tyre me armë kimike që vrau dhjetëra civilë më herët gjatë kësaj jave. Me urdhër të presidentit Donald Trump, anijet luftarake amerikane lëshuan 59 raketa Tomahawk në një bazë ajrore siriane ku gjendeshin avionët që kryen sulmet kimike,” thuhet në të njëjtin raportim.
SHBA-ja godet kështu për herë të parë në mënyrë të drejtpërdrejtë në gjashtë vite konflikt regjimin e Assad-it; një zhvillim i ri dhe domethënës, që ende nuk dihet se si do të vijojë.
“Sonte urdhërova një sulm ushtarak mbi një fushë avionësh në Siri prej nga nisi sulmi kimik,” u tha gazetarëve Donald Trump në një komunikim të shkurtër me ta.
Pentagoni bëri të ditur se rusët, mbështetësit e regjimit sirian, janë njoftuar për sulmin me raketa përpara se ai të nisë.
Në një reagim të parë, qeveria britanike e ka cilësuar goditjen amerikane me raketa si një përgjigje të duhur ndaj sulmit barbar me armë kimike. /tesheshi.com/
