Bisedimet maratonë në Gjenevë mes sekretarit amerikan të Shtetit, John Kerry, dhe ministrit të Jashtëm rus, Sergey Lavrov, kanë përfunduar me një marrëveshje që shihet nga të dy palët si një “pikë kthese” e mundshme në konfliktin e përgjakshëm sirian.
Një marrëveshje komplekse, ajo parashikon një ndërprerje shtatëditore të luftimeve duke nisur nga mbrëmja e së premtes. Ushtria siriane do të lejojë gjatë kësaj kohe dërgimin e ndihmave humanitare në zonat e kontrolluara nga kryengritësi në Halep, e këta të fundit do t’i ndalojnë luftimet rreth zonave nën kontrollin e forcave të regjimit.
Njëkohësisht, do të pezullohen sulmet ajrore të regjimit sirian në tërë vendin në zonat që gjenden në duart e kryengritësve.
Nëse ky armëpushim respektohet, forcat amerikane dhe ruse do të nisin operacionet e përbashkëta
ajrore kundër grupeve ekstremiste, ndërsa forcat ajrore siriane do të qëndojnë jashtë zonave të vëna në shenjë nga dy fuqitë botërore.
“Shtetet e Bashkuara dhe Rusia po bëjnë sot të njohur një plan që shpresojnë se do ta reduktojë dhunën, do t’i lehtësojë vuajtjet, e do të rinisë lëvizjen drejt një tranzicioni politik dhe një paqeje të negociuar në Siri,” deklaroi John Kerry.
“Kjo ka për të krijuar kushtet e nevojshme për rifillimin e procesit politik, të zvarritur prej kohësh,” ishin fjalët e homologut të tij, Sergey Lavrov.
Uashingtoni dhe Moska gjenden në dy anët e kundërta të konfliktit sirian, me amerikanët që mbështesin koalicionin e grupeve kryengritëse të moderuara, e rusët që i japin përkrahje të pakufizuar regjimit të Beshar Esadit. /tesheshi.com/
