Komiteti Olimpik i Shteteve të Bashkuara ka kërkuar falje për sajesën e katër notarëve amerikanë që pretenduan të ishin grabitur në Rio de Zhanejro.
“Sjellja e këtyre sportistëve nuk është e pranueshme, nuk përfaqëson vlerat e ekipit amerikan,” thuhej në një deklaratë të Komitetit Olimpik të Shteteve të Bashkuara.
Katër fituesit e medaljeve të arta për SHBA-të patën pretenduar ditë më parë se ishin grabitur nën kërcënimin e armëve, diçka që rezultoi të kishte qenë krejt ndryshe pas një hetimi të autoriteteve vendase.
Shefi i policisë civile të Rios, Fernando Veloso, e ka hedhur poshtë versionin e notarëve amerikanë, “Asnjë grabitje nuk u krye ndaj këtyre sportistëve. Ata nuk ishin viktima të krimeve që deklaruan.”
Gjithçka kishte ndodhur, sipas tij, ishte dëmtimi nga sportistët i i një tualeti në një pikë furnizimi me karburant, pas së cilës kishin ndërhyrë rojet e armatosura të sigurisë.
Edhe pse ai paralajmëroi për përballje të notarëve amerikanë me akuza për vandalizëm dhe dëshmi të rreme, dy prej tyre u lejuan mbrëmë të largoheshin nga Brazili. Njëri është larguar më herët, kurse i katërti mbetet ende në vendin amerikanolatin.
Ndërsa ka kërkuar falje, Komiteti Olimpik i Shteteve të Bashkuara e ka pranuar si të vërtetë përshkrimin e ngjarjes nga zyrtari brazilian i policisë. /tesheshi.com/
