Ka reaguar më në fund dhe Ambasada Amerikane ndaj verdiktit gjyqësor për ish-ministrin Tahiri.
Përfaqësia e Uashingtonit në Tiranë, e cila e ndoqi nga afër procesin, sa e përshëndet dënimin e dhënë aq dhe e kritikon atë, një qëndrim ambing vështirë i përkthyeshëm nëse i ka kënaqur apo jo amerikanët.
“Vendimi i djeshëm kundër ish-ministrit të Brendshëm Saimir Tahiri demonstron pavarësinë në rritje të gjyqësorit dhe fillimin e fundit të pandëshkueshmërisë për personat me lidhje të forta”, thuhet në pjesën e parë të deklaratës, për t’u pasuar nga e dyta që ka një ndryshim kursi në gjuhë.
“Ndërkohë që dënimi i zotit Tahiri për akuzën e shpërdorimit të detyrës sinjalizon një hap të rëndësishëm përpara, dënimi është shkurajues, duke pasur parasysh se sa të rënda ishin akuzat. Ata që shpërdorojnë besimin publik dhe shkelin ligjin duhet të përballen me pasoja domethënëse. Shtetet e Bashkuara do të vazhdojnë të mbeten partnerë të Shqipërisë, në mbështetje të përparimit të mëtejshëm të reformës në drejtësi, transparencës dhe qeverisjes së mirë”, përfundon deklarata. /tesheshi.com/
