Kreu PD-së zyrtare, Lulzim Basha, depozitoi në Kuvend atë që pak ditë më parë e quajti një “amdendament të rëndësishëm”. Ai kërkon nga qeveria shqiptare një ndihmë ushtarake për Kosovën rreth pesë miliardë lekë në vit, duke filluar nga viti 2024.
Në relacionin shpjegues, si shprehet:
“Kjo ndihmë financiare ka për synim forcimin dhe zgjerimin e kapaciteteve ushtarake të Republikës së Kosovës për mbrojtjen e sovranitetit, integritetit dhe tërësisë territoriale në një kohë në të cilën Republika e Serbisë po riarmatoset me objektiva të deklaruar për ndërhyrje ushtarake në Kosovë në momentin kur konjuktura politike do ta mundësonte këtë veprim”.
Duke iu referuar asaj çfarë ndodhi në Banjskë të Zveçanit, në veri të Kosovës, në shtator të vitit të kaluar, Basha argumenton “se duhet vepruar pa humbur kohë për forcimin e kapaciteteve mbrojtëse të Republikës së Kosovës. Disa nga vendet aleate kanë hedhur hapa aktivë në forcimin dhe zgjerimin e kapaciteteve mbrojtëse të Kosovës. Por në ndihmë të Kosovës dhe mbështetjen e aleatëve të saj duhet të renditet edhe Shqipëria”.
Amendamenti i propozuar prej tij kërkon uljen e investimeve kapitale jo të domosdoshme dhe miratimin e një shtesë zëri “ndihmë financiare ushtarake për Republikën e Kosovës” në masën pesë miliardë lekë.
Në terma politikë, ky akt patriotik i Bashës ngjan me luajtjen e një karte të ndjeshme sentimentesh kombëtare tashmë që i duhet rikthimi si faktor imponues në politikën e ditës. Njëherësh, tenton të vërë në pozita frustruese qeverinë. /tesheshi.com/
