Nga Blendi Gashi
Hashim Thaçit, ndonëse mandati i presidentit i përfundon në prill të vitit 2021, pra saktësisht pas pesë viteve, ish kreu i PDK-së qysh tani ka nisur rrugën që të ndryshojë mënyrën e zgjedhjes së kreut të shtetit.
I vetëdijshëm se është president jo konsensual, pra që nuk përfaqëson unitetin, Thaçi së fundmi paraqiti kërkesën e tij që kreu i shtetit të zgjidhet drejtëpërdrejt nga populli.
Ish kryeministri kosovar i cili haptazi disa herë ka bërë të ditur se mandatin e dytë si president do ta dëshironte vetëm nëse zgjedhja bëhet prej popullit, e di fare mirë se në rast të triumfit do të ketë një pushtet shumë më të fuqishëm se aktualisht, andaj edhe ka rikthyer në tavolinë temën në fjalë që dështoi vite më parë në mungesë të vullnetit të partive politike.
Siç dihet, zgjedhja e Atifete Jahjagës në postin e presidentes në vitin 2011, shtyri liderët e partive politike që me një marrëveshje ta nisin reformën e ligjit për zgjedhjet dhe ndryshimin e Kushtetutës, në mënyrë që presidenti i Kosovës të zgjidhet me vota të drejtpërdrejta nga qytetarët.
Më 22 prill të vitit 2011 u krijua komisioni për amendamentimin e Kushtetutës së Kosovës dhe komisioni për amendamentimin e ligjit për zgjedhjet e përgjithshme në Kosovë, e që do të duhej të përfundonin punën brenda periudhës nëntëmujore, por një gjë e tillë dështoi, pasi partitë politike nuk treguan vullnet dhe pajtueshmëri për një gjë të tillë.
Por shtrohet pyetja pse Thaçi e riaktualizoi temën e lartcekur pikërisht kur vendi gjendet në një krizë politike dhe kur janë shtuar zërat dukshëm për shkuarjen e vendit në zgjedhje?
Opozita dhe analistët e bëjnë fajtor pikërisht Thaçin për bllokimin e reformës zgjedhore që nisi të bëhej më 2011-të por që dështoi, ku një prej pikave ka qenë edhe që presidenti të zgjedhet drejtëpërdrejt nga qytetarët.
“Thaçi po bën spektakël”
Bilall Sherifi, sekretar i partisë NISMA për Kosovën, thotë se propozimi për zgjedhjen e presidentit nga populli është i kahershëm dhe jo i Thaçit.
“Në fakt Thaçi e ka bllokuar ndryshimin e zgjedhjes të kryetarit të Republikës nga populli. Tani duke e pasur parasyshe këtë fakt unë nuk besoj që bllokuesi i djeshëm ka për qëllim reformën në këtë çështje. Thaçi është përçarësi më i madh që ka pasur ndonjëherë skena politike e vendit deri më tani. Prandaj, ai nuk ka gjasa që të fitojë nga vota e drejtpërdrejtë qytetare. Ajo që ai tani po bën është veç një spektakël i tij përmes të cilit po përpiqet të shndërrohet në protagonist të skenës politike”, thotë Sherifi, për tesheshi.com
Analisti politik, Faik Krasniqi, thotë se kërkesa e Hashim Thaçit, që presidenti të zgjedhet nga populli, është një nga taktikat e tij të shumta, që sa më gjatë të jetë pjesë e politikës (pushtetit).
“Pse jo edhe një mandat tjetër si President, ose sipas dëshirave të këtyre politikanëve, edhe për disa mandate. Këta po të jenë në gjendje ngelin në skenën politike deri sa të vdesin. Kur populli, analistët, shoqëria civile dhe disa nga partitë politike kërkonin që Presidenti të zgjidhet për votës së popullit, Hashim Thaçi ishte kategorikisht kundër këtij. Por, tash i duhet të mendojë për mandatin tjetër, prandaj vjen edhe me propozime të tilla, sepse me votën e elektoratit të partisë së tij, ka shpresa që do fitojë edhe një mandat tjetër”, thotë Krasniqi, për tesheshi.com.
Islam Krasniqi, njohës i rrethanave politike thotë se kërkesa e paraqitur nga Thaçi që të ndryshohet mënyra e zgjedhjes së presidentit tregon etjen për pushtet të presidentit aktual.
“Presidenti Thaçi duke e parë së pazari politik ja humb fuqin presedentit, ai ka kërkuar që të bëhet reforma zgjedhore për zgjedhjen e presidentit, për t’ia hapur rrugën vetës që të përgatitet që mandatin tjetër të fuqizohet me votën e popullit, në postin e presidentit. Kjo më së miri tregon së etja për pushtet nuk do të shuhet asnjëherë. Është mëse e qartë se presidenti Thaçi qysh tani ka filluar të mendoj edhe për një mandat tjetër në krye të Presidencës”, thotë Krasniqi, për tesheshi.com.
Ndryshe, partitë opozitare thonë se janë për reformë zgjedhore, por se nuk është tani koha për një gjë tillë, pasi urgjentisht vendi duhet të shkojë në zgjedhje të reja. /tesheshi.com/
