Ambasadorja e Gjermanisë në Prishtinë, Angelika Viets shprehet e habitur se pse opozita kosovare nuk po gjen të tjera tema për trajtim, përveç çështjes së Demarkacionit me Malin e Zi.
“Çështjen e Demarkacionit jemi duke e përcjell me interesim të madh që nga momenti kur është arritur marrëveshja. Si duket, opozita nuk ka asnjë temë tjetër për ta trajtuar. Ata si duket kanë nevojë që të flasin edhe më shumë lidhur me këtë temë. Mirëpo, sa na përket neve nuk na lejohet që të komentojmë lidhur me këtë”, – thotë ambasadorja.
Ajo shton se është në dijeni që amerikanët e kanë bërë një verifikim të kësaj marrëveshje, gjithashtu ka pasur një grup ekspertësh në Komisionin e themeluar nga ish presidentja dhe ata e kanë verifikuar edhe një herë këtë marrëveshje.
“Po ashtu, anëtar i këtij grupi ka qenë edhe një shtetas gjerman me renome në këtë fushë. Të gjithë këta kanë arritur tek i njëjti rezultat sikur Komisioni shtetëror i kryesuar nga z. Murat Meha”, ka thënë ambasadorja Viets në një intervistë dhënë për KosovaPress. /tesheshi.com/
