Vazhdon përpjekja e autoriteteve turke kundër pranisë dhe ndikimit të organizatës FETO në Maqedoni. Në një intervistë për agjencinë e lajmeve Anadolu, ambasadorja e Turqisë në Shkup, Tülin Erkal Kara ka thënë se menjëherë pas formimit të qeverisë në Maqedoni do të shënojnë progres në luftën kundër kësaj organizate. Pra, sipas saj, shteti turk është në dijeni të të gjitha institucioneve në Maqedoni që kanë lidhje me FETO-n.
“Në Maqedoni, organizata ka shtatë shkolla, gazetën Zaman dhe disa biznese. Po ashtu, këtu ka edhe kompani dhe institucione shumë të rëndësishme të Turqisë, ndërsa ne kemi gjetur se ata janë infiltruar aty njëlloj sikurse në Turqi. Natyrisht, ne nuk e dimë numrin e saktë të këtyre, mirëpo drejtuesit e shumë institucioneve me të cilët jam takuar, janë shprehur se ishin kundër tentativës për grusht shteti në Turqi më 15 korrik”, tha ambasadorja Tülin Erkal Kara.
Ajo ka theksuar se u është dashur të takohen me të gjithë liderët e partive dhe t’u shpjegohet se sa e rrezikshme është kjo organizatë, duke u ofruar fakte dhe sqarime mbi atë që i ka ndodhur Turqisë prej saj, e që mund t’i ndodh dhe Maqedonisë.
Ambasadorja ka përmendur faktin se tashmë ka një vendim të qeverisë në Shkup për rishqyrtimin e shkollave që kanë lidhje me FETO-n, por ja që vetëm ministri i Arsimit, shqiptar, e ka kundërshtuar atë.
“Sidoqoftë, unë e di mirë dhe mendoj se nëse ministrit të Arsimit i shpjegohen aktivitetet e vërteta të kësaj organizate, atëherë edhe ai nuk do të mund ta kundërshtojë atë. Jam e mendimit se asnjë person nuk dëshiron që shteti i tij të rrezikohet nga një grusht shteti i këtillë. Rrjedhimisht, jam e bindur se me t’u formuar qeveria, ne do të sigurojmë me lehtësi transferimin e kompetencave të këtyre shkollave në Maqedoni”, theksoi ambasadorja Erkal.
Ambasadorja bëri të ditur se qëllimi i tyre nuk është mbyllja e shkollave të FETO-s, por transferimi i kompetencave të tyre fillimisht qeverisë së vendit ku gjenden, ndërsa që aty transferimi t’i bëhet Fondacionit Maarif. Ajo po ashtu njoftoi se janë duke zhvilluar aktivitete edhe për largimin e personave që kanë lidhje me FETO-n nga postet nëpër institucione. /tesheshi.com/
