Rreziku për kthimin e vizave për shtetasit shqiptarë në zonën shengen nuk ekziston. Kështu u shpreh ambasadorja e Shqipërisë në Holandë, Aida Sakiqi.
Prej disa ditësh mediat paralajmëruan se policia dhe prokuroria e Holandës i ka kërkuar qeverisë në këtë vend të shqyrtojë mundësinë e rikthimit të vizave për shtetasit shqiptarë, për shkak të nivelit të lartë të kriminalitetit ku ata janë përfshirë.
Nga ky moment politika në Shqipëri u përfshi në debate, ku opozita akuzoi kryeministrin Edi Rama si përgjegjësin kryesor të kësaj situate.
Por ambasadorja Sakiqi mohon ekzistencën e një raporti të tillë, aq më tepër rrezikun për kthimin e vizave.
“Ky rrezik nuk ekziston, është një vendim i shumë vendeve dhe jo i Holandës. Nuk ka pasur asnjë kërkesë të autoriteteve holandeze. Jam interesuar dhe kam marrë sigurinë se një raport i tillë nuk ekziston”, tha ajo.
E ftuar në studion e lajmeve të Top Channel, ambasadorja Sakiqi ka sqaruar se nuk ekziston asnjë raport zyrtar të policisë së Holandës.
“Nuk bëhet fjalë për një raport, por për një artikull të një gazete. Ai është një artikull i shkurtër me një intervistë me një polic. U habita kur e pashë artikullin e përkthyer si raport në disa media në Shqipëri. Në artikull thuhet se ekziston një memo, normalisht duhet të ekzistojë një gjë e tillë, nga ana e policisë, por nuk është raport”, ka sqaruar ambasadorja Aida Sakiqi. /tesheshi.com/
