Një ditë pasi dorëozi kredencialet në Presidencë, e ku u takua me kreun e shtetit Meta, ambasadorja e re amerikane në Tiranë Yuri Kim ka vijuar të takohet e bisedojë më anëtarë të kabinetit “Rama”. Një takim ajo e pati me ministren e Mbrojtjes Xhaçka, pas së cilit kjo e fundit shkroi: “Ishte vërtet një kënaqësi që prita sot në takimin e saj të parë zyrtar, pas prezantimit të letrave të saj kredenciale, Ambasadoren e SHBA në Shqipëri, Yuri Kim. E lumtur që ashtu si në takimin tonë të parë në Pentagon, vitin që shkoi, kur Ambasadorja Kim ishte pjesë e stafit të Sekretarit Amerikan të Mbrojtjes, ndamë të njëjtat vlerësime e konsiderata për nivelin e shkëlqyer të bashkëpunimit mes vendeve tona. Është fat për ne, që SHBA përfaqësohen në Shqipëri me një zonjë të kalibrit të ambasadores Kim…”, u shpreh gruaja që drejton ushtrinë shqiptare.
Më tej, qe ministrii Jashtëm në detyrë Gent Cakaj, i cili u takua me Kim, pas së cilit shkroi: “Mirënjohës për mbështetjen e pakursyer të Shteteve të Bashkuara të Amerikës për reformat e brendshme dhe forcimin e pozicionit ndërkombëtar të Shqipërisë. SHBA-ja është partner i pazëvendësueshëm politik e strategjik për Shqipërinë!”.
Një ditë më parë, gruaja që do përfaqësojë këtej e tutje diplomacinë amerikane në Tiranë mbajti dhe një fjalim para godinës së ambasadës, ku e vuri theksin te vijimi i Reformës në Drejtësi, edhe si kusht për investime amerikane. /tesheshi.com/
