Ambasadorja e Hollandës në Tiranë, tha se ndihet e keqardhur për shtimin e numrit të shqiptarëve të cilët po kërkojnë azil në vendin e saj. Sipas znj. Van de Weerd, Shqipëria konsiderohet një vend i sigurt, gjersa ka marrë dhe statusin e vendit kandidat.
“E them me keqardhje se me të vërtetë numri i azilkërkuesve nga Shqipëria është rritur në mënyrë shumë të lartë gjatë muajve të fundit, por edhe gjatë viteve të kaluara. Kjo është një situatë e vështirë, pasi Shqipëria është një vend i sigurt, një vend i cili ka marrë statusin e vendit kandidat për në Bashkimin Europian”, tha ajo dhe shtoi se kjo shuan shpresat për çdo emigrant shqiptar që kërkon azil politik se mund ta marrë atë: “Nëse je shqiptar dhe shkon në Holandë, nuk do të marrësh azil politik, aspak. Është humbje e parave dhe mundimeve që të përpiqesh të shkosh në Holandë”.
Zonja ambasadore më pas ka përcjellë një apel, që në raport me realitetin konkret shqiptar ngjan shumë poetik:
“Mendoj se është shumë e rëndësishme të përqendrohesh për të krijuar mundësi këtu në Shqipëri, të shohësh mundësinë të punosh dhe të jetosh në këtë vend. Ky duhet të jetë qëllimi i njerëzve…”.
Deklaratat e ambasadores Van de Weerd, u bënë gjatë një interviste për Vizion Plus.
E.H – /tesheshi.com/
