Në debatin PDK-LDK, ku e para kërkon zgjedhje të parakohshme por e dyta jo, ka ndërhyrë me stil ambasadorja gjermane, Angelika Viets, e cila, ka deklaruar se ato duhet të mbahen vetëm në 2018-ën, pra kur u takon me Kushtetutë.
Sipas saj, nëse zgjedhjet mbahen më herët, Kosova do të ketë ngecje në të gjitha reformat.
Këto komente, gruaja që përcjellë qëndrimet e Berlinit në Prishtinë, i mbajti gjatë promovimit të projektit “Forcimi i formulimit të politikave dhe hartimit të legjislacionit”, projekt ky i cili përkrahet nga Bashkimi Evropian dhe Gjermania.
Prej javësh janë shtuar zërat për zgjedhje të parakohshme në Kosovë, por e veçanta është se këtë gjë nuk po e kërkon opozita; po e kërkon partia në koalicion e drejtuar nga Kadri Veseli. Dhe kjo po përkthehet si një përpjekje e PDK-së për t’u shkëputur nga LDK-ja, ku synim i Veselit, aktualisht kryetar Kuvendi, është bërja kryeministër me një tjetër aleancë politike. Por LDK që duket se e ka nuhatur këtë lojë, nuk pranon që të shkojë në zgjedhje. /tesheshi.com/
