Vettingu në rradhët e policisë shqiptare do të rrisë besimin e qytetarëve. Kështu u shpreh ambasadorja e Holandës në Tiranë, Dewi van de Weerd, gjatë takimit me ministrin e Brendshëm, Fatmir Xhafaj.
Ambasadorja shprehu besimin për thellimin e bashkëpunimit mes dy vendeve në të ardhmen. Ajo pohoi se ka vërejtur masat e ndërmarra nga Policia e Shtetit për frenimin e fenomenit të azilkërkimit.
Bashkëbiseduesit ranë dakord për të thelluar bashkëpunimin në luftën kundër krimit të organizuar, përmes intesifikimit të shkëmbimit të informacionit.
Xhafaj e njohu Ambasadoren me prioritetet e Ministrisë së Brendshme në këtë mandat qeverisës. Mes tyre, nënvizoi procesin e vetting-ut në Polici, luftën kundër drogës, krimit të organizuar dhe parandalimin e azilkërkimit.
Ministri e njohu diplomaten me një sërë masash në forcimin e regjimit kufitar.
Një tjetër masë, shtoi ministri, do të jetë forcimi i kapaciteteve njerëzore dhe niveli profesional në Pikat kufitare. /tesheshi.com/
