Ambasadorja Çitaku në OKB: S’ka Shqipëri të madhe, por ka shqiptarë që synojnë Bashkimin Evropian

Ambasadorja e Kosovës në SHBA, Vlora Çitaku, ia ka rikujtuar Serbisë se deklaratat se shqiptarët janë duke synuar që të krijojnë një Shqipëri të madhe janë tërësisht të pavërteta.
“Serbia ka dështuar të ballafaqohet me të kaluarën e saj. Ka dështuar të ballafaqohet me krimet e mirëdokumentuara. S’ka Shqipëri të madhe, ka vetëm shqiptarë që jetojnë në Kosovë, në Maqedoni, në Mal të Zi, dhe normalisht në Shqipëri që synojnë të jenë pjesë e Bashkimit Evropian”, tha ajo, në seancën e Këshillit të Sigurimit të OKB-së, derisa ka shtuar se Kosova është shtet i pavarur dhe një pajtim Kosovë – Serbi mund të ndodhë vetëm kur Serbia pranon përgjegjësinë për spastrim etnik në Kosovë.
Çitaku i është kundërpërgjigjur ashpër ministres së drejtsisë në Serbi, Nela Kuburoviqit, e cila akuzoi Kosovën për trajtimin e pakicave, duke i thënë se serbët janë pakica më e privilegjuar në Evropë, kurse shqiptarët në Luginë diskrimonhen në mënyra të tmerrshme.
“Sebët e Kosovës janë pakica më e privilegjuar në Evropë, dhe ju e dini që shqiptarët në Preshevë, Medvegjë e Bujanoc diskriminohen në mënyrat më të rënda të mundshme. Këtë e di pasi vet i kam vizituar këto vende”, ka thënë Çitaku.
Ajo ka folur edhe për rezolutën 1244, të cilës ka thënë se i ka dal afati, me ç’rast ka falënderuar ambasadorin amerikan dhe atë francez që kanë thënë se është moment i duhur për të mbyllur misionin e UNMIK-ut në Kosovë.
“UNMIK-u nuk ka më rol në Kosovë dhe jemi të befasuar se kemi parë se buxheti i UNMIK-ut për vitin e ardhshëm është rritur”, deklaroi ajo.
Çitaku akuzoi Serbinë se po tenton që ta shfrytëzojë Këshillin e Sigurimit që të tregojë se ata janë superior karshi Kosovës, por që sipas saj kjo nuk është e vërtetë pasi Kosova është shtet dhe nuk ndihet inferior ndaj askujt.
“Serbia gjithmonë mundohet që t’i përfaqësojë shqiptarët si njerëz pa kulturë. Shkoni thuani këto fjala para Majlinda Kelmendit kampiones olimpike, apo Petrit Halilaj i nderuar nga juria e Berlinales” u shpreh ambasadorja kosovare.
Ajo në fund u ka bërë thirrje anëtarëve të këtij Këshilli që ta vizitojnë Kosovën, dhe ta shohin vet se situata nuk është e atillë siç e paraqet Serbia.
Duke folur për dialogun, Çitaku tha se Serbia po keqpërdorë procesin e dialogut dhe Interpolin, derisa ka përmendur rastin e Ramush Haradinajt, i cili brenda disa muajve u lirua si i pafajshëm nga autoritetet franceze.
“Haradinaj është liruar dy herë nga Tribunali i Hagës. Serbia nga aspekti ushtarak ka humbur Kosovën në vitin 1999 dhe me vendimin e GJND-së më 2009”, ka thënë Çitaku./Tesheshi.com