Kryediplomatja e Çekisë në Shqipëri e ka hedhur poshtë spekulimin se vendi i saj kërcënoi me vendosjen e vetos në BE, për kompaninë CEZ. Gjatë një vizite në Elbasan, Tomasova tha se nuk është vetoja çeke, problem kryesor, por CEZ.
“Si diplomat i huaj, nuk dua të komentoj për një çështje që është një çështje ndërpolitike në vendin tuaj. Në fakt, marrëveshja me mirëkuptim e qeverisë shqiptare me CEZ-in është mbështetur nga Banka Botërore dhe Komisioni Europian. Kur ne japim statusin për një vend konsiderojmë se si kanë ecur reformat në atë vend. Ne tani po presim raport-progresin që lëshohet nga Komisioni Europian dhe do të diskutojmë mbi të”, u shpreh Tomasova.
Spekulimi se qeveria bëri marrëveshje me CEZ për të shmangur vendosjen e vetos çeke në negociatat e anëtarësimit, gjeti së fundmi jehonë edhe nga LSI e cila deklaroi se me CEZ është bërë korrupsion politik.
Gjithsesi, mjegullnaja nuk mund të shpërndahet shpejt pasi ka përputhje mes datave kur Shqipëria paraqiti kërkesën për marrjen e statusit kandidat, kohë kur Çekia mbante presidencën e radhës, dhe marrëveshjen me mirëkuptim të qeverisë me CEZ. /tesheshi.com/
