Ambasadorja amerikane në OKB, Samantha Power, përdori një gjuhë mjaft të ashpër ndaj presidentit sirian, Bashar Assad, dhe aleatëve të tij rusë e iranianë gjatë një takimi të Këshillit të Sigurimit të martën.
“Për regjimin e Assad-it, Rusinë dhe Iranin: forcat tuaja janë duke i kryer këto krime. Bombat tuaja fuçi, mortajat dhe sulmet ajrore e kanë lejuar milicinë në Halep t’i rrethojë me dhjetëra mijëra civilë në lakun e shtrëngimit tuaj,” ka thënë Power.
“Është laku juaj,” deklaroi Power. “Tre shtete anëtare të OKB-së janë duke kontribuar për këtë lak rreth civilëve. Duhet t’u vijë turp. Në vend të kësaj, në të gjitha paraqitjet, kjo vetëm po ju trimëron. Ju po përgatisni sulmin tuaj të ardhshëm. A jeni vërtet të paaftë të turpëroheni?”
Shumë prej civilëve të plagosur në sulmet e kryera nga forcat proqeveritare janë në pritje të trajtimit në objekte të improvizuara mjekësore të qytetit, sipas raporteve nga terreni. Të tjerë janë duke u përpjekur të lënë shtëpitë.
“Kjo është një situatë e kolapsit të plotë të njerëzimit,” u shpreh zëdhënësi për çështje humanitare pranë OKB-së, Jens Laerke.
Forcat proqeveritare thuhet gjithashtu se i kanë vënë zjarrin një ndërtese të përdorur për strehimin e njerëzve që janë zhvendosur nga luftimet, me ndoshta më shumë se 100 fëmijë të bllokuar brenda.
“Vallë, a nuk ka asgjë që mund t’u turpërojë?” theksoi ambasadorja amerikane në fjalën në Këshillin e Sigurimit. “A nuk ka vallë asnjë akt barbarie ndaj civilëve, asnjë ekzekutim i një fëmije, që ta rrëqethë lëkurën tuaj? A nuk ka asgjë për të cilën të mos gënjeni dhe të mos justifikoheni?” /tesheshi.com/
