Ambasadori ukrainas në Beograd, Oleksander Aleksandroviç tha se Rusia po e keqpërdor Serbinë për të krijuar një kaos dhe për të provokuar një luftë të re në Ballkan.
“Vladimir Putin nuk mërzitet për Serbinë, ai vetëm po ju shfrytëzon si një instrument tjetër për të shkatërruar Evropën”, tha ai në një intervistë me BIRN.
Aleksandroviç tha se, sipas informatave të tij, janë pothuajse 300 serbë që aktualisht po luftojnë në Ukrainë. “Një aktivitet të tillë, Ukraina e konsideron si një akt terrorist”, thotë ai.
“Serbia votoi në 2014 për një ligj që ndalon qytetarët tuaj për të luftuar në vatrat e huaja të luftës, por Serbia po e injoron këtë problem”, tha Aleksandroviç duke shtuar se ai besonte se “lidhjet e tanishme midis serbëve dhe rusëve janë një pengesë e madhe për trajtimin e këtij problemi”.
“Këto mercenarë serbë po e diskreditojnë kombin tuaj në sytë e një populli miqësor, siç është ai i Ukrainës. Ne nuk ju kemi bërë asgjë ju. Parlamentarët tanë nuk udhëtojnë në Kosovë, dhe ne luajmë me futboll dhe basketboll kundër Kosovës në territorin neutral, sepse Ukraina nuk i njeh pasaportat e Kosovës. Gjithashtu ukrainasit nuk vijnë në Serbi për të vrarë serbët”, tha ai.
Ai shtoi se Serbia gëzon një imazh të keq në Ukrainë, pavarësisht lidhjeve sllave dhe ortodokse të dy popujve, si dhe traditës së gjatë të lidhjeve kulturore dhe bashkëpunimit.
“Kur politikanët serbë të udhëtojnë në Krime dhe lavdërojnë Putinin për ‘politikën e tij të mençur dhe të fuqishme’, kur keni mercenarë serbë, kur Serbia voton në OKB kundër Ukrainës, kjo sigurisht kontribuon në imazhin negativ të Serbisë në Ukrainë. Ne kemi një të ardhme të përbashkët në Bashkimin Evropian. Kjo është baza mbi të cilën mund të ndërtojmë marrëdhënie të shkëlqyera nëse ekziston vullneti i mjaftueshëm politik”, shtoi ai.
Për të gjitha këto qëndrime e deklarata, Ministria serbe e Punëve të Jashtme ia ktheu me paralajmërimin se nëse ambasadori ukrainas nuk “kthehet” brenda kornizës së Konventës së Vjenës, do të ndërmarrë hapa të caktuara”, të zakonshme për raste të tilla”. /tesheshi.com/
