Ambasadori turk në Shqipëri, Hydajet Bajraktar, ka bërë një tjetër deklaratë të ashpër anti-Gylen, deri në pikën që e ka niveluar atë me ISIS-in, sa i përket rrezikshmërisë.
I ndodhur në Shkodër në përurimin e përmendores së Hasan Riza Pashës, ai dhe Shqipërinë e renditi tek vendet e rrezikuara nga organizata së cilës shteti turk i ka shpallur luftë, sidomos pas mesit të korrikut të kaluar, ku tentativa e një grushti shtetit iu faturua pikërisht organizatës FETO, themeluar dhe drejtuar nga kleriku Fetullah Gylen,
“Ne si Turqi, ashtu si deri dje, kemi luftuar me armiq që luftonin përballë Hasan Riza Pashës; dhe sot na duhet të ndeshemi me armiq si organizata e ndryshme terroriste. Ne jemi në luftë të përheshme ndaj këtyre organizatave terroriste si FETO apo DAESH. Prandaj, me lejoni të theksoj se ne jemi në pritje që edhe autoritetet shqiptare të ndjejnë të njëjtën gjë dhe të jenë përkrah nesh në luften përkrah këtyre organizatave terroriste”, tha Bajraktar.
Prej muajsh, autoritetet e Ankarasë u kërkojnë atyre të Tiranës që të spastrojnë elementët gylenistë në Shqipëri, ku përfshihet mbyllja e kolegjeve të njohura turke, pas së cilës qëndron ideologjia e Gylenit. /tesheshi.com/
