Në një intervistë për Top Channel, ambasadori i Shqipërisë në Madrid, Ridi Kurtezi, ka thënë se nuk ka asnjë lidhje apo ngjashmëri mes pavarësisë së Katalonjës dhe asaj të Kosovës, siç kanë pretenduar dhe autoritet e Beogradit.
“Shpallja e Pavarësisë së Kosovës erdhi nga kërcënimi i paqes dhe sigurisë në Kosovë dhe gjithë rajonin, ndërsa në rastin e Katalonjës, ajo është një nga krahinat më të zhvilluar spanjolle. Mendoj që nuk ka fare krahasim midis këtyre dy dosjeve”, ka thënë Kurtezi. Ndërsa atë ç’ka po ndodh aktualisht në Katalonjë, ai e përcolli të tillë:
“Duke filluar nga dita e nesërme pushteti politik në komunitetin katalan, kalon në kompetencat e zv.Kryeministres Santa Maria. Me një urdhër të veçantë të ministri të Brendshëm, forcave të sigurisë do tu kërkohet të mos respektojnë me zinxhirin e komandimit lokal por të zbatojnë vetëm urdhrat e Guardia Civil, që është forca nacionale spanjolle. Pritet që Gjykata Kushtetuese spanjolle të fillojë një proces penal ndaj elitës politike katalane dhe kryesisht për presidentin dhe kryetarin e Parlamentit”, tha Ridi Kurtezi, ambasador i Shqipërisë në Spanjë. /tesheshi.com/
