Ambasadori i Shqipërisë në Kosovë, Qemal Minxhozi ka dalë në mbrojtje të kryeministri Rama lidhur me deklarimet e tij për Kosovën gjatë vizitës në Serbi. “Rama nuk ka folur ‘për Kosovën’ në Serbi, por ‘në interes të Kosovës’”, ka thënë Qemal Minxhozi, duke u përpjekur që me anë të kësaj fjalie të shkurtër të përçojë sa më shumë mesazhe sqaruese lidhur më keqkuptimet që sipas tij janë krijuar së fundi në opinionin kosovar.
“Kosova ka institucionet e veta, është një shtet i pavarur, një shtet demokrat, është një shtet sikur edhe Shqipëria. Por kjo nuk do të thotë që Rama nuk mund të flasë edhe për interesat e Kosovës, interesat e Shqipërisë apo të gjithë rajonit”, ka thënë ambasadori Minxhozi.
Më tej, ai ka shprehur rezerva edhe për pretendimet e një pjese të opinionit publik kosovar për paternalizëm nga ana e Ramës
“Shqipëria nuk ka kurrfarë qëllimi që të marrë rol paternalist ndaj Kosovës. Për më tepër Shqipëria e dëshiron marrëdhënien e ndërsjellë me Kosovën si dy shtete të pavarura”, sqaroi Minxhozi.
Sipas ambasadorit, nuk ka pse t`i fryhet një zjarri që nuk ekziston. /tesheshi.com/
