Vitaly Churkin, ambasadori i Rusisë në OKB, ka deklaruar në një intervistë se tensionet e tanishme me SHBA-në janë mbase më të mëdhatë që nga lufta e Lindjes së Mesme së 1973-shit.
“Mendoj se situata e përgjithshme është mjaft e keqe në këtë moment, mbase më e keqja që nga 1973-shi,” u ka thënë ai gazetarëve.
Përfaqësuesi i Rusisë është i mendimit se janë një varg gjërash që i kanë sjellë marrëdhëniet ruso-amerikane në këtë pikë të ulët.
“Eshtë një lloj mungese fundamentale e respektit, dhe një mungesë e diskutimeve të thella.”
Veçse Churkin thotë se marrëdhëniet e Luftës së Ftohtë midis Bashkimit Sovjetik dhe SHBA-së më shumë se dyzet vite më parë ishin të ndryshme nga marrëdhëniet e sotme amerikano-ruse.
“Edhe pse kemi mospajtime serioze, dallime si Siria, ne vazhdojmë të punojmë mbi çështje të tjera, e nganjëherë fare mirë,” ka shtuar ai.
Mbasi ka renditur një sërë arsyesh për përkeqësimin e marrëdhënieve, të shtrira në kohë, përfaqësuesi rus në OKB deklaron se Rusia dëshiron t’i normalizojë marrëdhëniet me SHBA-në.
“Nëse ndryshimi i administratës do të ndihmojë, kjo është shumë mirë. Por edhe sikur presidenti Obama të qëndronte një mandat tjetër, gjë që nuk e bën dot, ne do të përpiqeshim për t’iu kthyer normalitetit në marrëdhëniet tona,” ka nënvizuar Vitaly Churkin, pasi ka prekur një prej çështjeve më të nxehta në politikën e sotme ndërkombëtare. /tesheshi.com/
