Dunacan Norman u prezantua sot në Tiranë si ambasadori i ri britanik në vendin tonë. Tashmë shqipja duket një gjuhë mjaft e përdorur nga diplomatët, pasi edhe ambasadori Norman e nisi punën në gjuhën shqipe.
Ambasadori i ri në paraqitjen e prioriteteve të punës së tij u fokusua tek lufta kundër ekstremizmit, si një nga çështjet në të ndjeshme të ditës. “Kjo çështje fatkeqësisht prek shume vende ne botë, por Shqipëria ka një shembull të mirë për të dhënë. Ndoshta sfida me e madhe është lufta ndaj krimit te organizuar”, tha ai.
Sipas tij, Mbretëria e Bashkuar është prekur nga grupe të krimit të organizuar në një sërë fushash, si tregtia e narkotikëve, emigrimi i paligjshëm apo kontrabanda. Këto duket të jenë edhe fokusi i bisedimeve të të para me qeverinë shqiptare.
Shefi i diplomacisë britanike në vendin tonë, vlerësoi miratimin e reformës në drejtësi, ndërsa apeloi për zbatimin e saj.
“Miratimi i ndryshimeve kushtetuese ishte një moment mjaft i rëndësishëm për Shqipërinë por më e rëndësishme mbetet plotësimi i kuadrit ligjor dhe implementimi i saj”, tha Norman.
Dunacan Norman ka punuar në Shqipëri në vitin 1993 dhe sot pas 23 vitesh rikthehet si shef i diplomacisë britanike në vendin tonë. Ai vlerëson se dy vendet kanë një marrëdhënies të konsoliduar e cila njeh zhvillime të rëndësishme ndër vite. /tesheshi.com/
