“Drejtësia e vonuar është drejtësi e mohuar”, – kështu e nisi fjalën e tij kryetari i Prezencës së OSBE-së, Ambasadori Florian Raunig gjatë prezantimit të fazës së zbatimit të nismës “Për një drejtësi pa vonesa”.
Ai shtoi se efikasiteti i procedimeve gjyqësore është thelbësor për mirëqenien ekonomike dhe sociale të një shoqërie si dhe jetik për zbatimin efikas të legjislacionit.
“Në Shqipëri, gjyqet civile në gjykatat kryesore të shkallës së parë zgjasin mesatarisht 280 ditë. Pothuaj gjysma e seancave dëgjimore të monitoruara ishin tërësisht joproduktive, që do të thotë se në to nuk ndodhi asgjë e rëndësishme – as nuk u dhanë argumente, as nuk u qarkulluan dokumente, as nuk u morën prova dhe as nuk u paraqit ndonjë kërkesë”, – tha Rauing.
Sipas ambsadorit, çelësi i zbatimit me sukses të menaxhimit aktiv të çështjeve nga gjyqtarët qëndron te lidershipi në veprim: pra, gjyqtarët veprojnë si liderë brenda komunitetit të drejtësisë në rrethin e tyre, i bërë avokatët, prokurorët dhe profesionistët e tjerë të kësaj fushe t’i shërbejnë publikut.
“Ky lidership i përbashkët pasqyrohet edhe në bashkëpunim mes të gjithë partnerëve kombëtarë dhe ndërkombëtarë të pranishëm sot këtu. Pikërisht ky lloj bashkëpunimi është ai që nevojitet për përmbushjen e objektivit të një reforme të plotë në drejtësi”, – ishin fjalët e Raunig. /tesheshi.com/
