Ambasadori italian në Shqipëri, Alberto Cutillo, ka kërkuar nga autoritetet shqiptare që të luftojnë grupet e mëdha kriminale. Deklarata e ambasadorit italian pason atë të homologut të tij amerikan, Donald Lu, i cili para pak ditësh deklaroi prezencën e 20 familjeve të mëdha mafioze që kontrollojnë krimin.
Nga qyteti i Korçës, ambasadori italian ka folur në lidhje me luftën kundër krimit, duke thënë se pavarësisht se ka patur rezultate në luftën kundër kanabisit, qeveria shqiptare duhet të bëjë më shumë në luftën kundër grupeve të mëdha kriminale.
“Italia dhe Shqipëria po bashkëpunojnë prej vitesh në luftën kunder krimit të organizuar. Krimi nuk është fenomen shqiptar,por boteror. Kemi pasur rezultate në luftën kundër kanabisit, por Shqipëria duhet të bëje më tepër, sidomos për të luftuar grupet e mëdha kriminale. E rëndësishme është, që kur të kapen përgjegjësit, të dënohen, gjë që në fakt,deri tani nuk ka ndodhur”, tha diplomati italian. /tesheshi.com/
