Takimi i djeshëm i kryeministrit Nikola Gruevski me ambasadorët e 17 vendeve anëtare të BE-së nuk ka qenë i këndshëm.
Kjo pasi që në fillim Gruevski ishte vonuar për 40 minuta dhe se një pjesë e ambasadorëve ishin irrituar dhe po përgaditeshin që të largoheshin, por ka qenë ministri i jashtëm Nikola Popovski që i ka bindur ata duke thënë se kryeministri do të mbërrinte shumë shpejt. Këto prapaskena sot janë lansuar nga disa portale në gjuhën maqedonase, por që janë konfirmuar edhe nga burime diplomatike.
Sipas portalit Libertas, ambasadori i BE-së, Aivo Orav në takim ka pyetur Gruevskin për rastin e Kumanovës, duke i thënë se duhet një hetim objektiv me përfshirjen edhe të bashkësisë ndërkombëtare. Një nga pyetjet ka qenë se si ka mundur që i burgosuri i arrestuar i grupit të armatosur t`i ikë policisë në Karadakun e Shkupit, pra që bëhet fjalë për protagonistin Sulejman Osmanin.
Më tej euroambasadori Orav ka insistuar që të ketë hetime intensive edhe për përgjimet, ndërsa Gruevski duke i`u shmangur çështjes, ka folur për reformat në gjyqësor, përzgjedhjen e kandidatëve dhe rritjen e transparencës. Orav ka parë këtë situatë, ai ka qartësuar se politikat e Qeverisë nuk janë në përputhje me standardet për anëtarësim në BE dhe se mbi 80 për qind e qytetarëve duan që vendi të anëtarësohet në BE.
“Gruevski pas kësaj është përgjigjur se përcaktimi kryesor i Qeverisë është rritja e standardit jetësor të qytetarëve. Por për këtë i është kundërpërgjigjur Orav duke thënë se audioregjistrimet e përgjimeve tregojnë se sa dhe si po përkujdeset Qeveria për standardin e qytetarëve. Këtu edhe ka përfunduar biseda”, kanë shkruar portalet duke u thirrur në burime diplomatike. Takimi ka përfunduar në një situatë të tensionuar dhe se palët janë ndarë të pakënaqura. (INA)
