Ambasadori gjerman në Tiranë, Helmut Hoffmann, ka ironizuar arrestimin e prokurorit Haxhi Giu duke bërë thirrje për akte konkrete në luftën ndaj korrupsionit dhe për të kapur “gjelat e mëdhenj”.
Edhe pse nuk e përmendi në mënyrë konkrete, Hofmman tha se duhet një veprim konkret dhe për të prekur aty ku duhet.
Duke folur në tryezën konsultuese për drejtësinë kushtetuese, ambasadori gjerman ndërsa bëri një panoramë të problematikave në sistemin tonë të drejtësisë, theksoi se ka shumë gjëra normative që mund të bëhen në sistemin gjyqësor për të luftuar korrupsionin.
“Prokurorët dhe gjykatësit duhet të jenë të përkryer në punën që kryejnë.Të gjithë ankohen për korrupsionin masiv në gjyqësor pothuajse gjatë gjithë kohës. Ka gjyqtarë dhe prokurorë që jetojnë në kushte pasurie të pazakosnhme që në asnjë rrethanë nuk do të arrijnë përmes rrogës së tyre. Ata pretendojnë shpesh që këtë pasuri e kanë nga prindërit apo bashkëshortet. Dëgjohen gjithashtu që ka vrasës apo kriminelë të lirë në rrugë sepse me sa duket kanë bërë pazar me gjyqtarët dhe prokurorët. Është shumë e rrallë që një gjyqtar apo prokuror të pushohet nga puna si rrjedhojë e një mase disiplinore apo procesi disiplinor. Nuk kemi nevojë të themi më shumë për të treguar se pse është kaq e rëndësishme që të ndërmerren veprime të dukshme dhe të vendosura për ta bërë të qartë që shqiptarët jo vetëm flasin për këtë problem por edhe e zgjidhin këtë problem. Ka shumë gjëra normative që mund të bëhen në sistemin gjyqësor që do të ndihmonin për të luftuar korrupsionin me kalimin e kohës.”
Sipas kreut të Ambasadës gjermane, të gjithë prokurorët dhe gjyqtarët duhet të kalojnë në sitë, por porositi që ky verifikim të mos përfundojë në një farsë të pakuptimtë.
“Nuk lë përshtypje fare të mirë fakti që janë përdorur kaq pak instrumentat ligjore që janë ekzistuese për ta pastruar gjyqësorin. Pikëpamja e përhapur që ka shumë kundërshti ndaj reformës në sistemin gjyqësor sepse disa funksionojnë sipas avazhit të vjetër që gjelat e detit nuk mund të votojnë për Krishlindjet është jashtëzakonisht e dëmshme për reputacionin e Shqipërisë”, tha ai.
/tesheshi.com/
