Ambasadori i Gjermanisë në Kosovë, Christian Heldt, ka bërë atë që u duhet më së shumti grave të veja të Krushës së Prizrenit, ua ka promovuar produktet në supermarketet e Berlinit.
Gratë e Krushës, të cilat përgatisin ushqime të konservuara në fabrikën e ndërtuar për nënat kryefamiljare, ka kohë që ngrejnë zërin për më shumë fuqizim të tyre dhe blerje të turshive dhe perimeve të freskëta që ato shesin.
Zëri i tyre u dëgjuar me të drejtë nga ambasadori Heldt, i cili përmes një postimi në Facebook ka lavdëruar gratë vetëushqyese që për një dekadë ofrojnë shije të mira.
“Krusha është në dispozicion tashmë edhe në marketet e kryeqytetit të Gjermanisë – Berlinit. Për një dekadë, gratë e forta të Krushës punojnë si koorporativë në bashkëpunim me GIZ-in gjerman. U kam premtuar gjatë vizitës time të fundit se do të rris vetëdijesimin për ajvarin e tyre në Gjermani. Dhe tani ai është i pranishëm edhe në zemër të Berlinit”, ka shkruar Heldt.
“Gjermanë, hani më shumë ajvar, është i shëndetshëm dhe i shijshëm”, ka përfunduar ambasadori. /tesheshi.com/
