Ambasadori amerikan në Prishtinë, Greg Delawie, me rastin e shënimit të përvjetorit të 241-të të shpalljes së pavarësisë së SHBA-së u ka dërguar një mesazh të qartë politikanëve kosovarë duke thënë se nuk ka vend për ngërç politik dhe se duhet lënë anash interesat e tyre personale dhe ta formojnë qeverinë e re.
“Në këtë pikë kthimi nuk kemi kohë më për ngërç, është koha për përparim. Këtë e duan qytetarët e Kosovës dhe këtë e meritojnë. Përderisa kremtojmë përvjetorin e 21-të të Ditës së Pavarësisë së bashku, shpresoj se të gjithë mund të pajtohemi- prej qeverisë e deri tek opozita dhe prej bujkut e deri te shërbyesi civilë – se Kosova nuk mund t’ia lejojë vetes të shpenzojë më shumë kohë apo energji duke qëndruar në një vend. Ajo duhet t’i kthehet vendosmërisë të së ardhmes dhe ta ngazëllejë botën me përparimin e saj. Duhet të vë sistem të sundimit të ligjit që garanton mbrojtje të barabartë dhe llogaridhënie të barabartë për të gjithë. Ajo tashmë e ka demonstruar se mund të mbajë zgjedhje sipas mënyrës perëndimore, tani duhet të demonstrojë se mund të qeveriset në të njëjtën mënyrë”, ka thënë Delawie.
Diplomati amerikan më tej ka thënë se shpreson se udhëheqësit-qeveritarë e opozitarë do të demonstrojnë vlerën e kompromisit për hatër të zgjidhjes, si dhe vlerën e bashkëpunimit për hatër të përparimit të përbashkët, për ta krijuar të ardhmen e Kosovës si demokraci e rëndomtë evropiane. /tesheshi.com/
