Zyrtarë nga Instituti Arkeologjik i Kosovës, si dhe nga organizata “Trashëgimia Kulturore Pa Kufij”, i prezantuan ambasadorit amerikan Greig Delawie punimet që janë bërë në Kalanë e Prizrenit, ku Ambasada Amerikane ka investuar rreth 700 mijë dollarë.
Me këtë rast Delawie, ka thënë se Kalaja është pikë turistike shumë e vlefshme, jo vetëm për Prizrenin, por për gjithë Kosovën.
“Kalaja e Prizrenit është një prej vendeve më të mahnitshme në Kosovë dhe se shpresoj që pas këtyre investimeve, ajo do të mund të bëhet e qasshme nga vizitorët për shumë vite në të ardhmen”, tha ai.
Ndërkohë, nga Instituti Arkeologjik i Kosovës kanë thënë se ky projekt pritet të përfundojë në fund të këtij viti.
Shafi Gashi nga ky Institut, ka thënë se investime do të ketë edhe për dy vitet e ardhshme.
Në investimet që po bëhen në Kalanë e Prizrenit, pos Ambasadës së SHBA-së, rreth 400 mijë euro ka investuar edhe Ministria e Kulturës. /tesheshi.com/
