Ambasadori amerikan në Maqedoni, Xhes Bejli ka refuzuar të komentojë platformën e partive shqiptare, pasi duke e cilësuar veten “faktor të huaj”, tha se nuk është i interesuar për ndonjë platformë, por vetëm për reformat në Maqedoni dhe kthimin e shtetit në rrugën euro- atlantike.
Në një intervistë me televizionin “Sitel”, Bejli dha qëndrimin e tij se zgjedhjet e reja që kërkohen nga VMRO DPMNE, nuk garantojnë daljen nga kriza politike sepse askush s’mund të garantojë rezultatet të ndryshme nga ato të 11 dhjetorit.
“A do të formohet qeveri e re, do të varet nga 61 deputetët e Kuvendit. Do të duhet patjetër t’i pyesni ata. Në Telma para disa ditëve u tregua një anketë që tregoi se qytetarët nuk janë të interesuar për zgjedhje të reja. Unë nuk e di si do të jetë, por vendimi varet nga Kuvendi”, tha ambasadori amerikan.
Gjithashtu, shefi i ambasadës amerikane në Shkup sqaroi edhe zërat se USAID punon kundër qeverisë.
“Se USAID punon për shkatërrimin e Qeverisë, thjesht nuk është e saktë. Grantet nuk janë për mbështetjen e ndonjë ideologjie apo partie politike, apo diçka të ngjashme. Bëhet fjalë për krijimin e kushteve për demokraci aktive dhe të shëndoshë”, tha Bejli.
Sipas ambasadorit amerikan, kur është nënshkruar marrëveshja për formimin e PSP-së, askush nuk ka qenë i vetëdijshëm me sa material do të ballafaqohet ky institucionet dhe se për këtë komuniteti ndërkombëtarë angazhohet për vazhdimin e mandatit. /tesheshi.com/
