Kryetari i Lëvizjes BESA, Bilall Kasami në selinë e tij për herë të parë ka pritur si mysafirë ambasadorin e SHBA-ve në Shkup Xhes Bejlin të shoqëruar nga këshilltarët e tij.
Gjatë këtij takimi, Kasami ka njoftuar ambasadorin Bejli me aktivitetet e Lëvizjes BESA si shpresë e re në politikbërjen maqedonase, me ngritjen e strukturave, si dhe me kontributin që e jep BESA në demokratizimin e vendit dhe ndërtimin e rolit të saj të mirëfilltë opozitar. Ai po ashtu ka ripohuar se për BESËN është e rëndësishme të përmbushen në përpikëri detyrimet e Marrëveshjes së Përzhinës dhe pastaj vendi të shkojë në zgjedhje të drejta, demokratike dhe korrekte.
Përveç kësaj, Kasami e falënderoi Ambasadorin për punën e tij të deritanishme në demokratizimin e vendit dhe kërkoi që edhe më tej të vazhdojë ndihmesa e SHBA-ve për të krijuar kushte për zgjedhje të rregullta, sepse sipas tij, këto zgjedhje duhet të jenë çelësi i të ardhmes demokratike në Maqedoni.
Ndërkaq, ambasadori Bejli, nga ana e tij, e përshëndeti angazhimin e Lëvizjes BESA dhe kontributin e saj në mbarëvajtjen e proceseve demokratike në vend. /tesheshi.com/
