Ambasadori amerikan në Kosovë, Greg Delawie, paralajmaroi se një ditë forcat e KFOR-it do ta lënë vendin. E sipas tij, kjo do të ndodhë atëherë kur Kosova të ketë aftësitë që të vetëmbrohet.
Duke folur në seminarin Rose Roth të NATO-s, që po mbahet për herë të parë në Kosovë, Delawie tha gjithashtu se së shpejti do të bëhet edhe transformimi i Forcës së Sigurisë së Kosovës në ushtri.
“KFOR-i është shprehje e përkushtimit të aleancës së NATO-s për Kosovën. Është po ashtu një strukturë që respektohet shumë si nga shqiptarët ashtu edhe nga serbët e Kosovës. Por do të vijë dita kur KFOR-i më nuk do të jetë i nevojshëm, por jo derisa vendi nuk ka aftësi për vetëmbrojtje. Nuk do të lëmë vakum, por do të ketë një transformim të Forcës së Sigurisë së Kosovës në ushtri të Kosovës. Ky transformim duhet të përfshi të gjitha elementet kushtetues në Kosovë dhe duhet të bëhet në mënyrë të kujdesshme”, tha Delawie.
Edhe pse po bën 8 vjet shtet i pavarur, Kosova ende nuk ka ushtri. /tesheshi.com/
