Diplomatë të vendeve të Bashkimit Europian dhe ai i Shteteve të Bashkuara në Shkup u takuan me kryeministrin Nikolla Gruevski ku janë diskutuar ngjarjet e Kumanovës dhe përgjimet e publikuara nga opozita maqedonase.
Në takim kanë marrë pjesë ambasadori i Shteteve të Bashkuara të Amerikës, ai i Francës, Italisë, Belgjikës, Gjermanisë dhe ai i Bashkimit Europian.
Ambasadori amerikan tha se SHBA dhe vendet e tjera janë të gatshme për të ndihmuar Maqedoninë për ngjarjet e Kumanovës nëse ka nevojë për këtë. Ai ftoi qytetarët që të ruajnë qetësinë.
Sa i përket çështjes së përgjimeve, mësohet se diplomatët kanë kritikuar mungesën e veprimeve nga ana e Qeverisë për akuzat e hedhura. Sipas diplomatëve perëndimore kjo shton pikëpyetjet mbi aftësinë e Qeverisë për të zbatuar ligjin.
Ambasadorët thonë se mbështesin të drejtën e qytetarëve për të protestuar, por kërkojnë që në këto protesta të shmanget dhuna si nga ana e qytetarëve ashtu edhe nga ana e policisë.
