Ambasada ruse në Tiranë ka kundërshtuar akuzat e bëra nga një portal amerikan, sipas të cilit Moska ka ndërmjetësuar lobimin e Lulzim Bashës në Uashington, si dhe ka ndikuar për të destabilizuar zgjedhjet e 28 qershorit në Shqipëri.
“Mother Jones”, një portal mediatik me qasje anti-Trump, ka bërë një artikull të gjatë mbi takimet e Bashës, nga shkurti në 28 qershor.
Sipas portalit, i cili nuk se ka marrë ndonjë konfirmim zyrtar, “kontaktet ruse të Trump kanë ndihmuar edhe Bashën”.
Por sot ka ndërhyrë në debat edhe ambasada ruse në Tiranë, e cila ka kërkuar që të mos spekulohet më për këtë argument.
Reagimi i ambadadës ruse në Tiranë:
Kemi vënë re një artikull të publikuar më 6 mars në uebsajtin e revistës amerikane “Mother Jones” dhe të ribotuar nga disa gazeta shqiptare, për gjoja ndërhyrjen e Rusisë në zgjedhjet parlamentare të 2017-s në Shqipëri.
Materiali në fjalë përbën një trillim të radhës krejtësisht absurd, i cili ngjall keqardhje të thellë dhe nuk meriton komente të hollësishme. Spekulime të tilla janë pjesë e kontekstit të një fushate të pistë mediatike që është iniciuar nga mediat perëndimore kundër Rusisë. Qëllimi është i qartë: të imponohet një përceptim i shtrembëruar i vendit tonë dhe të minohen zhvillime të mundshme pozitive në bashkëpunimin midis Rusisë dhe Shqipërisë.
Theksojmë se ndryshe nga disa vende perëndimore, Rusia i përmbahet fort parimit të mosndërhyrjes në punët e brendshme të shteteve të tjera, përfshirë edhe Shqipërinë. Konfirmojmë edhe një herë gatishmërinë për komunikim dhe bashkëpunim të hapur me të gjitha forcat politike të Shqipërisë në interes të përparimit të dialogut dypalësh.
Shpresojmë gjithashtu që mendimi i autorëve amerikanë nuk përkon me qëndrimin e redaksive të mediave shqiptare, të cilat e kanë ribotuar artikullin e lartpërmendur.
/tesheshi.com/
