Ambasada amerikane përgënjeshtron opozitën: administrata Tramp kundër “çadrës”

Top Channel ka zgjedhur një mënyrë origjinale për të vërtetuar nëse administrata Trump e mbështet apo jo kauzën e opozitës shqiptare, e cila prej më shumë se një muaji është ngujuar në çadër me kërkesën për qeveri teknike për hir të zgjedhjeve të lira e të ndershme.

 Në lajmin e saj thuhet: “Top Channel iu drejtua ambasadës së Shteteve të Bashkuara ne në Tiranë dhe e pyeti se në çadër zoti Basha duket se pretendon se ka mbështetjen e administratës Trump për protestën e PD. A është kjo e vërtetë?

Përgjigjja e një prej zëdhënësve të Ambasadës ishte kjo: ‘Jo. Qeveria e Shteteve te Bashkuara mbështet zgjedhje të lira dhe të ndershme, dekriminalizimin dhe luftën kundër narkotikëve, por këto çështje nuk duhet të përdoren si shfajësime për të bojkotuar Parlamentin, për të bllokuar zgjedhjet, apo për të vonuar zbatimin e reformës së gjyqësorit. Nxisim dialogun midis qeverisë dhe opozitës për t’i zgjidhur këto’”,

Ndërkohë, si dje e si sot, kreu i PD-së, Lulzim Basha u ka thënë përkrahësve në çadër se ka mbështetjen e administratës Trump, e madje se është takuar me njerëz të kësaj administrate. Por që në këtë ligjërim nuk ka përmendur asnjë emër konkret politikani të lartë amerikan. /tesheshi.com/