Edhe pse prej tyre ka dalë ajo kënga me nota e vargje vajtuese “Aman Gjermani…”, sërish kosovarët mendjen tek Gjermania e kanë, si përgjithësisht shqiptarët në këto kohë.
Ndërsa ende nuk dihet numri i plotë i kërkesave nga qytetarët e Kosovës për viza Shchengen, vetëm në Ambasadën e Gjermanisë në Prishtinë gjatë vitit 2017 janë dorëzuar 50 mijë kërkesa për viza.
Kërkesat kanë qenë për viza turistike, afariste, për punësim, për studime e për bashkim familjar. Këtë e ka konfirmuar Ambasada Gjermane në një përgjigje për gazetën “Zëri”
.“Ambasada Gjermane në vitin 2017 i ka përpunuar gjithsej 50.000 kërkesa për viza.Këtu përfshihen kërkesat për qëndrime afatshkurtra (turizëm, udhëtime afariste, etj.), ashtu sikurse edhe kërkesat për qëndrime afatgjata (punësim, studime, bashkim familjar, etj.)”, thuhet në përgjigjen e Ambasadës Gjermane në Prishtinë.
Sipas një kalkulimi të thjeshtë del se rreth 190 kërkesa për viza në ditë janë bërë në Ambasadën e Gjermanisë, që në fakt është Ambasada me numrin më të madh të kërkesave për viza nga qytetarët në Kosovë.
Kujtojmë se politika kosovare nga viti 2012 premton heqjen e vizave por kjo sipas njohësve të integrimeve evropiane nuk do të ndodhë as sivjet edhe pse premtimet nga pushtetarët vazhdojnë. /tesheshi.com/
