Situata e sigurisë në Kosovë është e qetë dhe nën kontroll, dhe KFOR, forca paqeruajtëse ndërkombëtare e udhëhequr nga NATO, është gjithmonë e vetëdijshëme për situatën dhe rregullisht kryen vlerësime të sigurisë, por nuk është e përfshirë në luftën kundër terrorizmit – tha zëdhënësi i KFOR-it, Pio Sabetta.
“Situata e sigurisë është rezultat i shumë faktorëve, siç janë ekonomia, politika, prosperiteti … Gjithçka që mund të ndikojë në situatën e sigurisë monitorohet në baza ditore për të përcaktuar se çfarë masash mund të jenë të nevojshme”, tha Sabetta, si reagim ndaj aludimeve të Presidentit Vuçiç, por dhe disa mediave të Beogradit, par atë se mund të ketë incidentet në Kosovë gjatë vjeshtës, në kuadër të zgjedhjeve të parakohshme.
I pyetur nëse KFOR ka ndonjë njohuri për organizatën shqiptare B-13, për të cilën disa media në Serbi thonë se planifikon të sulmojë serbët në Mitrovicë dhe Zubin Potok përpara zgjedhjeve të Kosovës, Sabetta thekson se KFOR-i, në përputhje me një mandat të marrë nën Rezolutën e Këshillit Sigurisë 1244, “nuk ka asnjë rol në sundimin e ligjit ose zbatimin e ligjit në Kosovë dhe nuk është i përfshirë në luftën kundër terrorizmit, sepse është përtej mandatit të tij, por KFOR është duke monitoruar nga afër dhe vazhdimisht situatën”.
Sabetta u përgjigj në konfirmim kur u pyet nëse KFOR ishte i gatshëm të garantojë sigurinë për banorët e Kosovës në ditën e zgjedhjeve.
“KFOR kontribuon në sigurimin e një mjedisi të sigurt dhe lirisë së lëvizjes për të gjithë qytetarët e Kosovës, në mënyrë të paanshme, pavarësisht nga përkatësia etnike e tyre, dhe mbetet e përkushtuar për sigurinë dhe stabilitetin e Kosovës.”
Ai gjithashtu thotë se situata aktuale e sigurisë është e qetë dhe nën kontroll.
“KFOR është duke punuar në bashkëpunim të ngushtë me organizatat vendore dhe ndërkombëtare të sigurisë. Nëse ka ndonjë paralajmërim për një shkelje të mundshme të sigurisë, KFOR është i gatshëm të marrë masat e nevojshme për të mbrojtur sigurinë e Kosovës, në bashkëpunim të ngushtë me Policinë e Kosovës dhe EULEX, për të mirën e çdo qytetari që jeton në Kosovë”, theksoi Sabetta. /tesheshi.com/
