Altin Dumani, prokurori më i kuotuar për të marrë drejtimin e SPAKU-it, mund të konsiderohet si një ndër dëshmitë e suksesit të Reformës në Drejtësi. SPAK është dhe “zemra” e reformës bujëmadhe, e cila ka trazuar rëndë politikën, dhe njeriu që pritet të jetë në krye të kësaj strukture të destinuar për t’u vënë prangat dhe “të paprekshmëve” të politikës, është ai i cili detyroi Teo Jacobs, ndërkombëtarin e frikshëm të vettingut, që të ngrejë duart i dorëzuar përballë ndershmërisë dhe integritetit të dibranit që në 25 vite karrierë, ndër të tjera, posedonte vetëm 70 metra katror banesë.
“Kam marrë pjesë në 25 çështje dhe kjo është hera e parë që s’kam asnjë pyetje. Zoti Dumani qenka me fat”, u shpreh Jacobs.
Ndërkohë, vetë Dumani, ka dhënë një përgjigje tejet sinjifikative mbi arsyen se përse e synon postin e kreut të SPAKU-t.
“Lufta ndaj krimit është më prioritare se komoditeti zyrës”, citohet të ketë thënë Dumani, ku si provë të kurajos së tij profesionale, ka ofruar faktin se ka pranuar të shkojë prokuror në Tropojë, atë kohë ku dhe si vizitor trembeshe të shkoje: në vitin 2000.
Në terma shoqërorë, zgjedhja e pritshme e Altin Dumanit në krye të SPAK, është tregues se ndershmëria e aftësia profesionale, e merrka gjithsesi shpërblimin e vet dhe te kjo Shqipëri në krizë moraliteti të gjithëanshëm. Eshtë tregues gjithashtu, se dhe Reforma në Drejtësi ka jo pak tregues suksesi. Altin Dumani në krye të SPAK, është një prej tyre.
Ndërkohë, sa i përket zhvillimeve me protagonist presidentin Meta, rebelimin e tij ndaj ndërkombëtarëve pikërisht për Reformën në Drejtësi, pritet me interes se si do veprojë ai në dekretimin e SPAK-ut. Nga burime të brendshme brenda punës me reformën, është ai moment ku amerikanët kanë gati një përgjigje të fortë ndaj kreut të shtetit, të tipit Berisha-Llalla-Vasili-Dako, nëse ai vendos të “bëjë numra” dhe me këtë strukturë, e cila pritet të ekzekutojë korrupsionin dhe abuzimet në nivelet më të larta, dje, sot dhe nesër. /tesheshi.com/
